其實個標題應該係漫畫蟲定書蟲好呢…

我屋企真係有超多漫畫，基本上係成房都係，但係我標題唔係漫畫蟲係因為雖然漫畫係多…其實我係咩書都睇…

嗯…一個月支出係書到真係唔少喎，兩本週刊一本月刊就必買喇，有時無啦啦見個封面標題吸引又買，一兩本不定期漫畫出左又必買(而家少左好多喇…)，一兩本散文集出左又係必買，行街無野做又行下書局見到吸引又買一兩本…加加埋埋…真係…

以前有一個時期”想”養成去圖書館借書既習慣，但係自己始終都係唔鍾意…唔知點解見到好書就係想買番黎睇，借好似好無意思咁，又唔鍾意限住自己幾時借幾時還，限定時間睇書，我個習慣係成屋企都係書，坐抵隨手拎本就睇…唔知有冇人同我一樣咁既壞習慣呢?

搭車時無一本書又會好悶，所以自己習慣帶一個袋出街，週刊出版時間當然早已記熟，如不是出版日好多時都會自己帶一本出街…

自己係咪好有文化呢?又唔係丫…真係睇得超雜，漫畫唔駛講啦，好有文化歷史書又有，通俗文化又有，衛斯里金庸又有…真係服左自己…

但係發覺自己有D老人家囉，我好睇唔過眼而家既”小說”，見表妹手執一本”小說”，頁面上留吋半，下留吋半，中間隔行半吋，字體加大…夠竟係而家D人眼力唔好，定係作者無料到呢?以自己讀書時的記憶所及…好似無四萬字唔叫小說喎，最多叫短編，而家D”小說”作家知唔知架…成本二百頁可能唔夠金庸廿版咁多個字…唉

好多人話書中自有黃金屋…問我借書睇果D人就一定知…我自己習慣用一蚊美金做書簽，但係成日都唔記得拎返出黎…D人借我書多數都會問我…點解入面有錢既??

有好多書都好想買…不過而家D書好貴呀! 可唔可以要求D紙唔好咁靚，唔駛硬皮封面，唔駛頭尾有彩頁，賣返平D呀??

好多人話大陸書好…我都試過買…唔係唔識睇簡體字…不過辛苦D囉，台灣買書係一個唔錯既選擇，但係唔係樣樣都平架，有D好怪香港係平過台灣…唔知點解，同埋你試過就知喇，書…係唔輕架…你大隻拎得咩?唔好唔記得overload係要俾錢架….